திருக்குறள் - பயனில சொல்லாமை

 திருக்குறள்

பயனில சொல்லாமை- அதிகாரம்-20

குறள் 191: 

பல்லார் முனியப் பயனில சொல்லுவான்

எல்லாரும் எள்ளப் படும்.

குறள் விளக்கம்:

பலரும் வெறுக்கும்படி பயனில்லாத சொற்களையே சொல்லும் ஒருவன், உலகினர் எல்லாராலுமே இகழ்வாய்ப் பேசப்படுவான்.

குறள் 192: 

பயனில பல்லார்முன் சொல்லல் நயனில

நட்டார்கண் செய்தலின் தீது.

குறள் விளக்கம்:

பலபேர் முன்பாகப் பயனற்ற பேச்சைப் பேசுதல், நன்மை அல்லாத செயலை நண்பர்களிடத்தில் செய்வதைவிடத் தீமையானது ஆகும்.

குறள் 193: 

நயனிலன் என்பது சொல்லும் பயனில

பாரித்து உரைக்கும் உரை.

குறள் விளக்கம்:

பயன் இல்லாத ஒன்றைப் பற்றியே விரிவாகப் பேசும் ஒருவனது பேச்சானது, 'அவன் நல்ல பண்பில்லாதவன் 'என்பதை உலகுக்கு அறிவிக்கும்.

குறள் 194: 

நயன்சாரா நன்மையின் நீக்கும் பயன்சாராப்

பண்பில்சொல் பல்லார் அகத்து.

குறள் விளக்கம்:

பயனோடு சேராத பண்பற்ற சொற்களைப் பலரோடும் சொல்லுதல், எந்த நன்மையையும் தராததோடு உள்ள நன்மையையும் போக்கிவிடும்.

குறள் 195: 

சீர்மை சிறப்பொடு நீங்கும் பயனில

நீர்மை உடையார் சொலின்.

குறள் விளக்கம்:

நல்ல பண்பு உடையவர்களும், பயன் இல்லாத சொற்களைச் சொல்வார்களானால், அவர்களுடைய சிறந்த தன்மையும் சிறப்பும் நீங்கிப் போகும்.

குறள் 196: 

பயனில்சொல் பாராட்டு வானை மகன்எனல்

மக்கட் பதடி எனல்.

குறள் விளக்கம்:

பயனில்லாத சொற்களையே விரும்பித் தொடர்ந்து பேசுபவனை ,' மனிதன்' என்றே சொல்லக் கூடாது ; மக்களுள், 'பதர் ' என்றே கொள்ளல் வேண்டும்.

குறள் 197: 

நயனில சொல்லினுஞ் சொல்லுக சான்றோர்

நபயனில சொல்லாமை நன்று.

குறள் விளக்கம்:

நன்மை இல்லாதவற்றைச் சொன்னாலும் சொல்லலாம். பயனில்லாத சொற்களை எப்போதுமே சான்றோர் சொல்லாமலிருத்தல் நல்லது.

குறள் 198: 

அரும்பயன் ஆயும் அறிவினார் சொல்லார்

பெரும்பயன் இல்லாத சொல்.

குறள் விளக்கம்:

அருமையான பயன்களை ஆராய்கின்ற அறிவாளர்கள், பெரும் பயனில்லாத சொற்களை ஒரு போதுமே சொல்ல மாட்டார்கள்.

குறள் 199: 

பொருள்தீர்ந்த பொச்சாந்துஞ் சொல்லார் மருள்தீர்ந்த

பெரும்பயன் இல்லாத சொல்.

குறள் விளக்கம்:

மனமயக்கம் நீங்கிய குற்றமற்ற அறிவை உடையவர்கள், பயனில்லாத சொற்களை மறந்தும்கூட ஒரு காலத்திலும் சொல்ல மாட்டார்கள்.

குறள் 200: 

சொல்லுக சொல்லிற் பயனுடைய சொல்லற்க

சொல்லிற் பயனிலாச் சொல்.

குறள் விளக்கம்:

சொன்னால், பயன் தருகின்ற சொற்களையே யாவரும் சொல்லுக ; பயனில்லாத சொற்களை ஒருபோதுமே எவரும் சொல்லாதிருக்க வேண்டும்.

-திருவள்ளுவர்