திருக்குறள்- தீவினையச்சம்

 திருக்குறள் 

தீவினையச்சம்- அதிகாரம்-21 

குறள் 201: 

தீவினையார் அஞ்சார் விழுமியோர் அஞ்சுவர்

தீவினை என்னும் செருக்கு.

குறள் விளக்கம்:

தீய வினை என்ன அகங்காரத்துக்கு, கேடு செய்பவர்கள் அஞ்சமாட்டார்கள். ஆனால், வாழ்வை நேசிப்பவர்கள் அஞ்சுவார்கள்.

குறள் 202: 

தீயவை தீய பயத்தலால் தீயவை

தீயினும் அஞ்சப் படும்.

குறள் விளக்கம்:

தீய செயல்களால் எப்போதும் கெடுதல்தான் ஏற்படும். அதனால், நெருப்பைவிட தீய செயல்கள் தீங்கானது.

குறள் 203: 

அறிவினுள் எல்லாந் தலைஎன்ப தீய

செறுவார்க்கும் செய்யா விடல்.

குறள் விளக்கம்:

தனக்குத் தீமை செய்தவர்க்குக்கூட தீமை செய்யாமல் இருப்பதுதான் அறிவினுள் சிறந்த அறிவு.

குறள் 204: 

மறந்தும் பிறன்கேடு சூழற்க சூழின்

அறஞ்சூழம் சூழ்ந்தவன் கேடு.

குறள் விளக்கம்:

மறந்தும்கூட பிறருக்குத் தீங்கு செய்யக் கூடாது. அப்படி செய்ய நினைத்தால் அறமே உனக்குத் தீங்கு விளைவிக்கும்.

குறள் 205: 

இலன்என்று தீயவை செய்யற்க செய்யின்

இலன்ஆகும் மற்றும் பெயர்த்து.

குறள் விளக்கம்:

ஏதும் இல்லாதவனுக்குக் கெடுதல் செய்ய நினைக்காதே; அப்படிச் செய்தால், உன்னிடம் இருக்கும் அனைத்தும் விலகிப்போய் நீயே ஏதும் இல்லாதவனாகிவிடுவாய்.

குறள் 206: 

தீப்பால தான்பிறர்கண் செய்யற்க நோய்ப்பால

தன்னை அடல்வேண்டா தான்.

குறள் விளக்கம்:

தன்னைத் துன்பங்கள் தீண்டக் கூடாது என்று நினைப்பவர்கள், மற்றவர்களுக்கு எந்தத் தீங்கும் செய்யக் கூடாது.

குறள் 207: 

எனைப்பகை உற்றாரும் உய்வர் வினைப்பகை

வீயாது பின்சென்றடும்.

குறள் விளக்கம்:

எந்த வித எதிர்ப்பையும் மீறி ஒருவர் வாழ்க்கையில் மீண்டு வர முடியும். ஆனால், நாம் செய்யும் தீய செயல்களால் வரும் பகை நம்மைத் துன்புறுத்திக் கொல்லும்.

குறள் 208: 

தீயவை செய்தார் கெடுதல் நிழல்தன்னை

வீயாது அடியுறைந் தற்று.

குறள் விளக்கம்:

ஒருவரை அவருடைய நிழல் தொடர்வதைப்போல, அவர் செய்த கேடும் அவரைத் தொடர்ந்து வந்து துன்பம் தரும்.

குறள் 209: 

தன்னைத்தான் காதலன் ஆயின் எனைத்தொன்றும்

துன்னற்க தீவினைப் பால்.

குறள் விளக்கம்:

ஒருவன் தன் மீது நேசம் உள்ளவனாக இருந்தால், மற்றவர்களுக்கு எப்போதும் தீங்கு செய்யக் கூடாது.

குறள் 210: 

அருங்கேடன் என்பது அறிக மருங்கோடித்

தீவினை செய்யான் எனின்.

குறள் விளக்கம்:

தீவினைகள் செய்யாமல் இருப்பவன் வாழ்க்கையில் ஒருபோதும் துன்பம் இல்லாமல் இருப்பான்.

-திருவள்ளுவர்