திருக்குறள்- மன்னரைச் சேர்ந்தொழுகல்

திருக்குறள்

 மன்னரைச் சேர்ந்தொழுகல்- அதிகாரம்-70

குறள் 691:

அகலா தணுகாது தீக்காய்வார் போல்க 

இகல்வேந்தர்ச் சேர்ந்தொழுகு வார். 

குறள் விளக்கம்:

மாறுபடும் வேந்தரைச் சேர்ந்து வாழ்கின்றவர்கள், அவரை விட்டு மிகவும் நீங்காமலும், மிகவும் நெருங்காமலும், தீயில் குளிர்காய்பவரைப் போலப் பழகி வர வேண்டும். 

குறள் 692:

மன்னர் விழைய விழையாமை மன்னரான் 

மன்னிய ஆக்கம் தரும். 

குறள் விளக்கம்:

மன்னர் விரும்புகிற பொருள்களைத் தானும் விரும்பாதிருக்கும் தன்மையானது, அம்மன்னராலே நிலைத்திருக்கும் செல்வங்களை ஒருவனுக்குத் தருவதாக விளங்கும். 

குறள் 693:

போற்றின் அரியவை போற்றல் கடுத்தபின் 

தேற்றுதல் யார்க்கும் அரிது. 

குறள் விளக்கம்:

அரசன் சினங்கொண்டால் அவனைத் தெளிவித்தல் அரிதானதால், அரசனைச் சார்ந்திருப்பவர், பொறுத்தற்கரிய பிழைகள் தம்மிடம் நேராமல் காத்துக் கொள்ள வேண்டும். 

குறள் 694:

செவிச்சொல்லுஞ் சேர்ந்த நகையும் அவித்தொழுகல் 

ஆன்ற பெரியா ரகத்து. 

குறள் விளக்கம்:

அறிவாற்றலில் சிறந்த பெரியவர்கள் கூடியுள்ள அரசவையில் இருக்கும்போது, காதோடு காதாகப் பேசுவதையும், பிறரோடு சேர்ந்து சிரிப்பதையும், நீக்கிவிட வேண்டும். 

குறள் 695:

எப்பொருளும் ஓரார் தொடரார்மற் றப்பொருளை 

விட்டக்கால் கேட்க மறை. 

குறள் விளக்கம்:

அரசனின் மறைவான பேச்சுக்களைக் கேளாமலும், அதன் தொடர்பாக எதுவும் சொல்லாமலும் இருந்து, அவனாகச் சொன்னால் மட்டுமே கேட்டல் வேண்டும். 

குறள் 696:

குறிப்பறிந்து காலங் கருதி வெறுப்பில 

வேண்டுப வேட்பச் சொலல். 

குறள் விளக்கம்:

அரசனது உள்ளக்குறிப்பை அறிந்து, காலத்தையும் கருத்திற் கொண்டு, அரசனுக்கு வெறுப்புத்தராத சொற்களை, அவன் விரும்பிக் கேட்கும்படி சொல்ல வேண்டும். 

குறள் 697:

வேட்பன சொல்லி வினையில எஞ்ஞான்றும் 

கேட்பினும் சொல்லா விடல். 

குறள் விளக்கம்:

அரசன் விரும்புகிற செய்திகளை மட்டும் அவனிடம் சொல்லியும், அவனுக்குரியவை அல்லாதனபற்றி அரசனிடம் சொல்லாமற் கைவிடுதலும் வேண்டும். 

குறள் 698:

இனையர் இனமுறையர் என்றிகழார் நின்ற 

ஒளியோ டொழுகப் படும். 

குறள் விளக்கம்:

"இளையவர்" என்று கருதியோ, "இனமுறை" என்று கருதியோ இகழாமல், நிலைபெற்ற அறிவுடன் அரசனிடம் நடந்து கொள்ளுதல் வேண்டும். 

குறள் 699:

கொளப்பட்டோம் என்றெண்ணிக் கொள்ளாத செய்யார் 

துளக்கற்ற காட்சி யவர். 

குறள் விளக்கம்:

தாம் அரசராலே மதித்துக் கொள்ளப்பட்டோம் என்று, அவர் ஏற்றுக்கொள்ளாத செயல்களைக் குற்றம் இல்லாத அறிவுடையவர்கள் செய்ய மாட்டார்கள். 

குறள் 700:

பழைய மெனக்கருதிப் பண்பல்ல செய்யும் 

கெழுதகைமை கேடு தரும். 

குறள் விளக்கம்:

மிகப் பழையகாலத் தொடர்புடையோர் என்று நினைத்தும் பண்பில்லாத செயல்களைச் செய்பவனின் நெருக்கமான உரிமை, அவனுக்கே கெடுதல் தரும்.

-திருவள்ளுவர்