திருக்குறள்- அவை அறிதல்

   திருக்குறள்

அவை அறிதல்- அதிகாரம்-72 

குறள் 711:

அவையறிந் தாராய்ந்து சொல்லுக சொல்லின் 

தொகையறிந்த தூய்மை யவர்.

குறள் விளக்கம்:

ஒவ்வொரு சொல்லின் தன்மையும் உணர்ந்துள்ள நல்ல அறிஞர்கள், அவையில் கூடியிருப்போரின் தன்மையையும் உணர்ந்து அதற்கேற்ப ஆராய்ந்து பேசுவார்கள்.

குறள் 712:

இடைதெரிந்து நன்குணர்ந்து சொல்லுக சொல்லின் 

நடைதெரிந்த நன்மை யவர்.

குறள் விளக்கம்:

சொற்களின் வழிமுறையறிந்த நல்லறிவாளர்கள் அவையின் நேரத்தையும், நிலைமையையும் உணர்ந்து உரையாற்ற வேண்டும்.

குறள் 713:

அவையறியார் சொல்லல்மேற் கொள்பவர் சொல்லின் 

வகையறியார் வல்லதூஉம் இல்.

குறள் விளக்கம்:

அவையின் தன்மை அறியாமல் சொற்களைப் பயன்படுத்துகிறவர்களுக்கு அந்தச் சொற்களின் வகையும் தெரியாது; பேசும் திறமையும் கிடையாது.

குறள் 714:

ஒளியார்முன் ஒள்ளிய ராதல் வெளியார்முன் 

வான்சுதை வண்ணங் கொளல்.

குறள் விளக்கம்:

அறிவாளிகளுக்கு முன்னால் அவர்களையொத்த பாலின் தூய்மையுடன் விளங்கும் அறிஞர்கள், அறிவில்லாதவர்கள் முன்னால் வெண்சுண்ணாம்பு போல் தம்மையும் அறிவற்றவர்களாய்க் காட்டிக் கொள்ள வேண்டும்.

குறள் 715:

நன்றென் றவற்றுள்ளும் நன்றே முதுவருள் 

முந்து கிளவாச் செறிவு.

குறள் விளக்கம்:

அறிவாளிகள் கூடியிருக்கும் இடத்தில் முந்திரிக் கொட்டை போல் பேசாமல் இருக்கிற அடக்கமானது எல்லா நலன்களிலும் சிறந்த நலனாகும்.

குறள் 716:

ஆற்றின் நிலைதளர்ந் தற்றே வியன்புலம் 

ஏற்றுணர்வார் முன்னர் இழுக்கு.

குறள் விளக்கம்:

அறிவுத்திறனால் பெருமை பெற்றோர் முன்னிலையில் ஆற்றிடும் உரையில் குற்றம் ஏற்படுமானால், அது ஒழுக்க நெறியிலிருந்து தளர்ந்து வீழ்ந்து விட்டதற்கு ஒப்பானதாகும்.

குறள் 717:

கற்றறிந்தார் கல்வி விளங்கும் கசடறச் 

சொற்றெரிதல் முன்னர் இழுக்கு.

குறள் விளக்கம்:

மாசற்ற சொற்களைத் தேர்ந்தெடுத்து உரை நிகழ்த்துவோரிடமே அவர் கற்றுத் தேர்ந்த கல்வியின் பெருமை விளங்கும்.

குறள் 718:

உணர்வ துடையார்முன் சொல்லல் வளர்வதன் 

பாத்தியுள் நீர்சொரிந் தற்று.

குறள் விளக்கம்:

உணர்ந்து கொள்ளக்கூடிய ஆற்றல் உள்ளவர்களின் முன்னிலையில் பேசுதல், வளரக்கூடிய பயிர் உள்ள பாத்தியில் நீர் பாய்ச்சுவது போலப் பயன் விளைக்கும்.

குறள் 719:

புல்லவையுள் பொச்சாந்தும் சொல்லற்க நல்லவையுள் 

நன்கு செலச்சொல்லு வார்.

குறள் விளக்கம்:

நல்லோர் நிறைந்த அவையில் மனத்தில் பதியும்படி கருத்துக்களை சொல்லும் வல்லமை பெற்றவர்கள், அறிவற்ற பொல்லாதோர் உள்ள அவையில் அறவே பேசாமாலிருப்பதே நலம்.

குறள் 720:

அங்கணத்துள் உக்க அமிழ்தற்றால் தங்கணத்தர் 

அல்லார்முன் கோட்டி கொளல்.

குறள் விளக்கம்:

அறிவுள்ளவர்கள், அறிவில்லாதவர்களின் அவையில் பேசுவது, தூய்மையில்லாத முற்றத்தில் சிந்திடும் அமிழ்தம்போல் வீணாகிவிடும்.

-திருவள்ளுவர்